TUNTUT SELALOM

Samo macam lain-lain tuntut, tuntut sang jati pun arao "BAHASA DALAM" ataw tuntut yo aro lalaom makna o. Suang ngkali suda tuntut-tuntut gulungan macam eno nelasod sabab kurang enisu, ataw kurang suda jelama tatuwo jati yo aro masa iti ngamal tuntut-tuntut laid tapi gananti gama tuntut-tuntut agu tarutama o tuntut nisu mok sekola eyo eno Malayu ya Inggeris.

Jaye kan suba mangingat ya magium mok jelama-jelama jati yo arao suang pengalaman tantang hal iti. Antara tuntut-tuntut selalaom yang kuji parnah karangow samuwonla:

1. "Ngalapis sidan"  bamakna "makan miup kadiok sapaya andi malaus la"

2. "Pandai- pandai basi"  bamakna " pandai batuntut tapi andi asi"

3.  "Kadim-kadim manuk"  bamakna  "makan sandiri gulu baru ngadim lama lain makan"

4.  "Eyaw ain ka sengadaw" bamakna " jati eyaw mok dunya ti arao masa susa arao masa sanang ni"

5. "Nabubul bulu" bamakna "naye usin"

6. "Marijang"  bamakna "talampaw kuat makan ataw rangka"

7. "Pamulut" bamakna "kuat ngal tuntut, pandai mengal sarita yo andi lurus"

8. "Laku asu ya ramo" bamakna "santiasa bagutoal satiap kali batamu"

9. "Laku lama kalap talam" bamakna "tindak-tindak talampaw nayak gina taman kakalap
      barang agu, barang naratu tad langaon banasa andi malap esu lage"

10. "Adaop-adaop manuk" bamakna " salalu kaliman gala, andi kalap madaop malaong"

11. "Laku asu kagagaol manuk"  bamakna "nyanyat andi baranti"