INGAT-INGAT KALAW MALI MOK SUPERMARKET

Ti andi gi buai masa jalama batarimo gaji.

Tarimo gaji baarti kadai-kadai panu ya jalama mamali barang. Mali barang dapur la. Mali barang sakula anak-anak la. Macam-macam gala yo kan gon mali.

Mamali mimang andi paya. Aro usin uno barang yo dikendaki malap lapon. Asal cukup usin gala. Tapi arus ni jati ingat-ingat waktu jati ngembayar bayaran-barang eno tarutama o mok kadai gayo  suntu o supermarket.

Suang suda jalama silap masa ngembayar eno. Ero andi ngintong uno kanatik gama kakimu juruwang kadai mok komputer o. Biasa o juruwang (cashier) kadai supermarket eno andi pandai banor pasal rago barang-barang ne skan (scanned) o eno karna ainka diso ngecap rago sengaye barang mok kadai. Yo mengal rago eno eyo no jalama lain. Adaong nyala kakimu juruwang eno. Kadang-kadang lain rago barang lain yo sanatit gama komputer diso.  Kalaw rago $2.00 mok label, mok skrin komputer tamalang $2.25!  Ti karna rago barang eno memang suda nendau gama tuki kadai tapi eyo no andi enuba mok data memori komputer kadai. Na...... kan jati suda rugi 25 sen. Eno taman tunggal barang gala. Kalaw suang barang enali,  suang ni engkali rugi jati. 

Jadi o adaong la kamuan ngintong skrin pabila mambayar barang-barang jati selalu.  Kalaw aro sala tarus gon nagur. Gon ngecik banor-banor. Kalaw aro sala adaong lakak nyu jalama kadai eno ngalurus. Kalaw andi malap gon nyelasai papuli gala barang yo sala rago eno. Adaong mbayar. La biasa jalama kadai ngemboyok jati. Kan jati mpuan usin,  diso mpuan barang. Ero andi buli ngayam paksa-paksa mok jati.

Adaong kamuan la.  Jati andi rugi kalaw salalu ingat-ingat.