Suang jalama pandai kisah ti tapi anjop suang yo mau basarita. Na..... kuje gala nyarita mok blog ku iti sapaya suang jalama bole karangow . (Ha ha.... kalaw mbaca mana malap karangow? Ganjil. ganjil.)
Memang sarita pasal batu tabaol pasaw ti ganjil. Uno ande ganjil.... suba neo jati bapikir. Bole ka tabaol pasaw eno jadi batu? Kalaw pun bole, macam mana eyo bole jadi batu suang-suang saboi malap pabali ero mok jati selalu? Lagipun batu tabaol pasaw ti (kalaw banor aro) suang banor guno o. Kalaw aku ande sala eyo no suang paeda o macam batu galiga barangkali. Suba muyun muot mok jalama tuo. Pandai ero uno guno batu tabaol pasaw eno.
Taktik ataw modus operandi (ah tuntut uno ti?) maksud ku sara-sara jalama pabali mok jati sapaya jati tapadaya biasa o macam iti:
Aro sanginan jalama mikot ngantamu jati ngara diso aro batu tabaol pasaw. Eyo ngara jati eyo mau nak mok jati batu eno pasal eyo kakalap patunjuk senalom nupi o. Eyo andi bole nak batu eno mok jalama lain, kain o lagi. Andi buai tad eno mikot sanginan jalama tarus "ngacau" tuturan, nikom bua pasaw mok langon jalama tunggal eno kamaye. Eyo kan ngatok batu eno ya barang kadow. Tok tok tok katab batu eno. Memang katab o macam batu. Memang batu la no. Uno lagi eyo pun tarus ngara eno memang batu tabaol pasaw. Eyo pun ngara batu eno suang guno o. Rago ni. Suang lama mau.
Lakunan satarus o jalama yo awal eno tarus nyingkat bua pasaw eno pura-pura ngibit jati midu. Eyo ngara jati eyo andi malap pabali mok lama lain batu eno karana pasal nupi o.
Wow macam banor-banor ayu o. Jati pun uno lagi pasaya ni li diso. Jati muot puro no rago batu eno kalaw jati mau mali. Andi eyo mau pabali jawap o. Eyo cuma gitak ambo gala aro. Senalom $260 ka kalaw malap katab o. Eno pun andi lagi cukup sarita o. Eyo ngira jati kalaw jati suda kakalap usin suang pabila ngisu batu eno untuk nulung lama lain, jati adaong kalamuan untuk basadaka usin mok lama lain.
Kalaw jati njawap anjop aro usin suang eno eyo laju nagara jati andi apa. Eyo muot puro jati sanggup gala. Kalaw kain jati $30 gala usin jaye aro eyo pun pura-pura bapikir lalom-lalom. Ok gala katab o.
"Nah usin $30," kain jati nak diso usin. Eyo pun ngalap usin eno , basalam ya jati lapas eno manaw li lain. Bua pasaw ya "batu" tabaol pasaw mapong mok jati. Usin $30 jati suda nalap o. Ainka narampas o. Jati nak diso pasal pasaya tuntut o.
Macam eno la jalan carita sandiwara jalama pabali batu tabaol pasaw palsu.
Memang palsu. Andi pasaya suba lapon batu eno go ngabur mok aig. Yupo aig eno. Aro raso ka? Kalaw dul sidan, bule mancoi ka dul sidan jati gama aig batu eno?
Medan-medan sarita jaye ti kasaboi mok jalama suang sapaya andi kasuat tipu gama lama-lama yo mikot eno.
Ingat la sabalum jati andi lagi kasuat!
No comments:
Post a Comment