Salamat jati katamu lagi. Medan-medan muyun sangaye santiasa sihat, gena sanang usin pun suang.
Ti kisa panipuan. Tad laid gulu pun memang suang lama suka manipu. Salalu o manipu rata banda, manipu usin ringgit, manipu bagabow ngara bujang walaupun sawo o suda aro duo, ya lain-lain o.
Jaye basarita pasal suat tipu gama jalama teksi. Mantiti sarita o.
Minggu lapas samasa anak suti sakula jaye ngibit aki jaye manaw-manaw makan angin li Singapura ya Johor. Masa mok Singapura jaye manaw-manaw ngisu teksi ya MRT (Mono Rail Train ). Anjop aro masalah. Sengaye ok gala. Anjop aro panipuan kito ku.
Lain hal o samasa jaye ngibit aki ku nanaw li Johor samasa malawat LEGOLAND, tampat anak-anak mangayam. Sadu o labe kurang 30 kilomitar tad JB Sentral. Kalaw manaw li sino paksa ngisu teksi pulang balik.
Jaye tak dudul teksi wana kuning tad JB Sentral manaw li Legoland. Teksi no ngisu mitar. Jati kito mitar usin o bapusing-pusing. Saboi mok Legoland bacaan mitar teksi no ngara RM21.00. Campur sukai RM5.00 jadi RM26.00 sengaye o Banayar jaye lurus-lurus. Pamandu teksi no lama banca Malayu. Sampat ni eyo ngara di jaye kalaw muli la adaong ngisu teksi yo bawarna biru tuo. Ero nipu no, kain o. Jaye pun ngangguk ulu walaupun andi pa paham uno maksud o sadaongkan ero samo-samo ngibit teksi ni, pikir ku.
Suda waktu kan muli dapadaw eno jami bagium teksi. Sengaye teksi dino warna biru tuo. Anjop aro teksi jenis lain. Buai ni ngintai kalaw-kalaw aro mikot teksi jenis lain eno. Anjop ni aro mikot. Karna sangal ngintai las-las o jami tarpaksa ni ngisu teksi biru tuo eno. Ngisu mitar ni. Daribar o supan santun. Banca asal o tad Jawa, Indonesia tapi buai suda garom mok Johor. Jami muli tad Legoland li JB Sentral ngisu langgayo yo samo macam masa jami mikot kemaye. Jaye bapikir uno gaya o teksi biru ti andi samo ya teksi kuning yo lain eno. Mulo-mulo o andi jaye kakito. Bila jaye ngintong mitar o manaw, wah wah laju. Dua talu rapo suda apat ngapod sen. Apat limo kilomitar suda duo ngapod RM. Saboi li KL Sentral mitar o banaca jaye suda RM51.00. Andi bule katab. Kan teksi o eno ngisu mitar macam bantuka teksi warna kuning kemaye ni. Suma panaw laju mitar o andi samo. Suat tipu pasal mitar la jami masa eno.
Jaye basarita ti pasal kan ngara di jelama suang sapaya adaong suat tipu macam jami eno lage. Kalaw jaye mikot li seno lain kali andi jaye mau ngisu teksi, uno gala teksi pun andi mau. Jaye kan ngisu bas awam ataw pun nyatar van gala . Kalaw aro, ngisu MRT lagi mancoi, laju saboi, 100% andi suat tipu.
Adaong suat tipu tiap-tiap kali manaw. Sukup la.
No comments:
Post a Comment