"JALAMA" JAWA

Kuji salalu muwot mok jalama Sang Jati pagun ti arao ka ero pandai ataw karangow uno ngaran ao yo sabiton jati sabagai "JAWA" eno. Kadang-kadang lama jati nyabit diso "LAMA JAWA MOK ENTALUN" ni.

Ngaran Jawa ti arao no ngaran tampat mok pagun Indonesia. Pulau Jawa ngaran ao. Pagun nao suang panduduk ao. Jalama biasa macam jati ti ni. Ainka kuo isi entalun yo andi malap entangan jati.

Na...  uno nao kari ao kuo yo mok entalun jati ti yo andi kalap kakito ganalar jalama tatuwo jati  tagulu sabagai "JAWA"?    Uno kaitan ao ya pagun Indonesia eno ?



 
Suang ni tuturan narangow jaye. Macam-macam katab ao.

Sa inan jalama batutur kain ao Jawa yo arao mok entalun jati ti sabanaor ao barasal nikot tad Pulau Jawa, Indonesia.  Ero nao sakti malap malanjaop malap tamalang.  Ero eno, kain carita ao, nikot li siti ngantusut mok entalun nidu tad sujar Jipun tagulu. Ero batapa andi samilaw salagi andi tamat tempo ao.

Nyugut tuturan jalama jati sandiri Jawa mok entalun jati ti memang makhluk yo sarupa manusia tapi anjaop arao arit munung bibir ao. Ero ainka manusia. Ero arao la banca alus, mahkluk mok dunya ti  yo jati andi kalap kakito. Ero magaraom mok entalun-entalun gayao. Yo entangan jati laku entalun eno arao no kampung ya alai-alai suang tapi entangan jati sa macam kayu-kayu gala.   Ero eyaw macam jalama ni, ya anak , ya keluarga ni. Ero andi makan nubur macam jati. Nyugut carita, Jawa ti suka makan giok. Ero andi makan uson macam jati jalama biasa ti. 

Arao duo talu sarita pasal jalama jati ngencawo makhluk Jawa ti. Saboi arao anak ya aki kain ero.


 

Dambao nao yo banaor tuturan pasal Jawa ti?

Pagun Jipun ngadudul sujar ao baparang li siti senalom taun-taun 1941 - 1945. Tapi carita pasal Jawa mok entalun ti suda arao baratus-ratus taun tagulu. Mungkin ni tuturan jalama Jawa nikot batapa mok entalun eno macam andi pa lurus gaya ao. 

Tapi ngal eran ni uno kari ao mahkluk eno ganalar jalama-jalama laid jati tagulu sabagai Jawa!

Senalom gandangan jati arao ni miso gandang yo ganalar jati Gandang Jawa. Katab gandang ti kan sarupa Gandang Pagilayan. Rancak. Gandang Jawa ti gon ngalawod samasa balian tamarok makan parai. Jawa alus ti malap samulod mok balian. Arao ni jalama balian kalap ngadim datao banca Jawa ti. Datao jenis ti mancoi kain ero.    

Katab tuturan jalama jati ampak tagulu banca Jawa alus ti ngamal katab tuntut tunggal gala. Andi suka bagabow. Andi suka ngal rat. Ero suka parangai mancoi gala. Kalaw bajanji masti lurus.

Pakaian ero warna ao kuning. Periasan alan ero pun kuning sangaye.

Banaor andi ka tuturan ero nao andi la kuji kalap pandai saratus paratus. Uno ni sala ao kalaw muyun muwot mok jalama yo labi bapangalaman senalom sarita Jawa ti. Tapi pasti ao, Jawa alus mok entalun jati  ti ainka jalama nidu batapa nikot tad Pulau Jawa, Indonesia.  Kalaw pun ero mau ngantusut tad sujar Jipun, ngantusut gala la mok pagun ero sandiri. Andi paya mikot li pagun jati siti. Andi munasabah kan eno kalaw dipikir banaor-banaor.




Kalaw arao tuturan agu, agaon kuji nyambung la sarita pasal tajuk ti turi la......