Kisa ti suang tanutur gama jalama tatuwo tad tagulu lagi.
Yandaol ya sawo ao ti karijan duo namaong raraw parai tiap-tiap adaw. Malumla kalaw andi agaon namaong maye la parai kanaon kara kanaon gabuk. Kalaw anjaop parai susa la jadi ao. Anjaop arao la kan kanaon.
Duo ti garaom mok sulap diok. Sulap raraw kain jati. Sukup-sukup gayao ntuk alan madaop ya alan bagancak gala. Sino la alan duo namaong raraw duo eno.
Duo ti anjop arao anak. Duo arao ngiaw sanginan asu manyanai. Asu ti maya nyugut duo magaraom mok alan diok duo eno, suma andila senalom tapi mok pantaran saribow gala. Mancoi ni. Arao ni ntuk ngenjaga pintu alan. Kalaw jalama arao mikot asu ti muda misiw.
Sadaop adaw eno sawo Yandaol ti ngabubuh mbuyat gala. Andi nyungkad nubur. Agas duo andi pa suang lagi tinggol ao jadi paksala duo jimat-jimat bagancak nubur la maye agas duo. Salalu ao macam eno la ayu iyaw jalama masa tagulu sawaktu ero manamaong raraw.
Mancoi ni gena duo seganao sawo ti nakan saboi-saboi naye mbuyat miso kudut gayao eno enakan duo.
"La Ndol. Naye mbuyat ti nakan tadao. Uno la isu tadao nyumad asu adao ti!" kain sawo Yandol ngara di Yandaol. Salalu ao kalaw arao labi akan-akan eno la yo kan isu duo nyumad asu duo yo sanginan eno.
"Banaor ni," jawap Yandaol. "Andi apa, umbuh labu kakal lagi arao. Takan gala di diso, ' ara Yandol li mok sawo ao.
"Tapi Ndol labu ti asu andi pandai makan," kain sawo Yandaol nganjawap.
" LABU LABU MAKAN NI AKU," katab asu duo ti batuntut. Macam eno la katab yo narangow duo.
Wow. Nakasaot gena Yandaol ya sawo ao nakakito asu duo pandai batuntut macam eno. Dapadaw lagi. Adaw kan liom suda.
"Yaw Ndol. Asu tadao ti pandai batuntut," kain sawo Yandaol ngara anao ao. Enintong ao rabah asu duo eno. Kalaop-kalaop gala mata ao mengintong di duo.
Nalakak banaor gena duo Yandol seganao sawo ti kuma.
"Mancoi tadao midu Ndol. La matai tadao kanaon asu tadao ti la," kain sawo Yandaol ti kuma.
Uno lagi lingkas-lingkas duo ti nidu nendau tad sulap duo ti nuju li mok alan sulap jalama sambila raraw duo eno. Mikang panaw duo midu eno kan ngaduan asu duo. Asu duo ti pun naya nyugut duo tad likud. Andi mau mapong. Makin laju duo manaw, makin laju asu duo eno basimbul nyugut di duo. Kan kampusan napas duo seganao sawo manaw mikang-mikang sabaoi-sabaoi li mok alan jalama sambila eno baru sanang gena duo. Asu duo kakal ni nyugut di duo tad likud.
" Uno hal ao? " uwot jalama lain ti kuma pabila nakakito rabah Yandaol ya sawo ao napusat nalakak.
"Ti. Asu endo ti pandai bantutut," jawap sawo Yandaol.
Enintong ero rabah asu duo eno anjaop ni arao ruba-ruba rupa ao. Macam biasa gala. Ikiw ao kipos-kipos mayak gena sabab andi suat duan gama empuan ao ti kuma.
Na manino la kisa sarita Yandaol ti kuma. Kisa asu ao pandai bantutut. Pandai nyimbar tuntut jalama. Banaor ka asu ti pandai batuntut macam jalama? Ganjil ni tapi uno gala senalom dunya ti sengaye buli balaku. Suma Alatala gala yo pandai. Jati sabagai manusia memang andi kalap pandai sengaye eno.
Ok la. Iti suma sarita laid. Sarita jalama nalakak. Uno hal ao kalaw duo Yandaol ti kuma andi nidu? Andi la jati kalap pandai.
Suba-suba la muyun kalaw arao hal macam iti adaong midu, agaon namaong gala ntuk ngintong uno kan tajadi salapas eno. Agaon nulis tuturan ao alan jati sangaye pandai la. OK nao? Adaong kalamuan ngara di jaye sarita muyun eno la.
No comments:
Post a Comment