KASUAT TIPU RAGAO BARANG

Sanginan kawan nakasuat lagi kaniab kan nakabali barang yao sala cap ragao mok kadai.

Eyo ti bagium uru usai bambul. Kaliling manau mok kadai-kadai diok anjop ni karumpak. Jadi diso mapit la mok kadai supermarket kawasan Kampong Sungai Liang.  Tantu sino suang banca barang arao.

Gium gium li sariba sawat rak barang-barang diok-diok baruu nao diso karumpak barang yumoan diso nao. Nayak gena diso. Ragao ao pun andi ni pa ragao. 60 sen miso bungkus diok. Panili ao duwo bungkus. Lapas eno diso pun bagium barang-barang lain.

Masa kan ngambayar, diso pun naya babaris ngintai giliran dapan kaunter juruwang. Jalama andi pa suang babaris. Suma apat limo inan gala. Andi ni barapa buai ngintai pasal talu kaunter banuka sambaya masa eno.

Pabila sabaoi giliran diso kan ngambayar barang diso pun pakiat uno pasal ragao uru usai bambul eno jadi 80 sen.  Andi samao macam ragao yao tanampil mok bungkus ao.  Diso pun muwot uno pasal ao jadi sala macam eno. Kakimu juruwang andi pandai nganjawap.  Kalurusan ni masa eno pangawas supermarket eno arao etog-etog andi pa sadu dapan kaunter. Diso pun mikot ngara di kawan ti kuma uru usai eno memang ragao ao 80 sen . Ain 60 sen kain ao.

" Uno pasal cap barang tanampil  60sen. Tapi muyun pabali 80 sen?" kain kawan ti andi pa puas gena.
Pangawas ti kakal ni ngara eno memang ragao ao 80 sen miso bungkus, ainka 60 sen.

"Cap harga 60 sen tapi jual 80 sen".

Ngal lasu gena ni ngarangow  jawapan pangawas supermarket eno. Diso nao banca India. Ainka jalama pagun. Lagipun  diso nao makan gaji gala sino. Anjop ni ta kalap komisin keuntungan kadai supermarlet eno. Duwo ngapaod sen memang andi ni suang tapi gaya kadai manipu jalama suang mata-mata laku eno memang suda ngalampau.  Ainka tunggal barang. Mungkin suang lagi barang lain pun macam eno ni. Lain cap ragao tanampil tapi lain la ragao agaon ngambayar.  Kalau jadi mura andi ni apa. Ti jadi ragao gat.

Kawan ti andi puas gena. Andi diso jadi mali uru usai eno.

 -----------------------------------

Nah....... eno la kisa pangalaman sanginan kawan yao kadiok lagi kan kasuat  buyuk mata-mata gama supermarket.  Nasip gala diso sadar nakito ragao yao sala eno. Kalau andi tantu eyo suda kasuat tipu.  Andi la jati pandai. Memang suang ni jalama lain yao kasuat tipu macam eno tapi andi ero kasadar ataupun andi ero paduli. 

-------------------------------------

Mancoi ni ta jati ingat-ingat ngintong alus-alus samasa ngambayar barang dambao gala tarutama ao mok kadai-kadai gayo laku supermarket, hypermart atau yao lain nao. Andi jadi rugi jati.